Monday, April 28, 2008

പ്രതീക്ഷ

ഓരോ തിരകള്‍ അകലുമ്പോഴും
നീയായെത്തുന്ന തിരയെയും
കാത്തു ഞാനീ തീരത്തുണ്ടാവും
മണല്‍ ഉണങ്ങുമ്പോഴും
നിലാവകലുമ്പോഴും
നിന്റെ കാല്പ്പാടുകള്‍
തേടി ഞാനിരിക്കും
എന്റെ ചെവികളിലേക്കാഴ്ന്നിറങ്ങുന്ന
ഓരോ ശബ്ദവും നിന്റെ
അധരത്തില്‍ നിന്നും കൊഴിഞ്ഞതാവണെ
എന്നു ഞാന്‍ കൊതിക്കും
പൊഴിയുന്ന ഓരോ മഴത്തുള്ളികളിലും
നിന്റെ മുഖം ഞാന്‍ കാത്തിരുന്നു
നീയെത്താത്ത ഓരോ നിമിഷവും
എന്റെ കണ്‍കോണുകളിലൊരു
മിഴിനീരായി നീ ഒലിച്ചിറങ്ങും

Wednesday, April 2, 2008

ആത്മഹത്യ...

ഉരുകിയ മോഹങ്ങളൊഴുകുന്നു കണ്‍തടങ്ങളില്‍
പിടക്കുന്നു മുറുകിയ നരമ്പില്‍
പായുന്ന ചോര പോലും
തൊടിയിലോടിക്കളിച്ചൊരാ പൈതല്‍
ഇന്നുമ്മറത്തെരിയും തിരിക്കരുകിലുറങ്ങുന്നു
ചോര വര്‍ന്ന മുലയൂട്ടുമൊരമ്മതന്‍ തേങ്ങലടങ്ങിയോ..
പാതിവഴിയിലൊറ്റപ്പെട്ടു പോയൊരാ
മോഹസൌധം ഉയര്‍ന്നരുകില്‍ നില്‍ക്കുന്നു
തോരാതാര്‍ത്തലച്ച മഴയില്‍
മുങ്ങിയതെന്നുടെ സ്വപ്നങ്ങള്‍
പായുന്ന പുഴയിലൊഴുകിയകന്നു
പുത്തന്‍ കതിരു പൊങ്ങിയ പാടങ്ങള്‍
വയല്‍ വരമ്പിന്നൊരത്തൂര്‍ന്ന
കയറില്‍ പിടക്കുന്നതെന്നുടെ സ്വപ്നങ്ങള്‍.......